İndoneziyada məktəb uçdu
Cakarta, 30 sentyabr (Hibya) – İndoneziyanın Şərqi Cava bölgəsində yerləşən internat məktəbinin binasının uçması nəticəsində ən azı bir şagird həlak olub, onlarla insan yaralanıb və 65 şagirdin dağıntılar altında qaldığı bildirilib.
The Guardian-ın xəbərinə görə, bazar ertəsi günü Şərqi Cava əyalətinin Sidoarjo şəhərində yerləşən “Al Xoziny” İslam internat məktəbinin binası uçub və nəticədə ən azı bir şagird həyatını itirib. Yerli hakimiyyət orqanları hadisə zamanı dua edən şagirdlərin dağıntılar altında qaldığını və 65 nəfərin itkin düşmüş kimi qeydə alındığını açıqlayıb.
Xilasedici qruplar, polis və hərbçilər gecə boyu axtarış-xilasetmə işlərini davam etdirərək ən azı səkkiz yaralı şagirdi dağıntılar altından çıxarıb. Lakin hadisə yerində əlavə cəsədlərin tapılması səbəbindən ölənlərin sayı arta bilər.
Yaşları 12 ilə 17 arasında olan şagirdlərin ailələri xəstəxanalarda və məktəbin ətrafında narahat gözləmələrini davam etdirirlər. Xilasedici qruplar dağıntılar altında qalanlara oksigen və su çatdırmağa çalışırlar.
Azərbaycan İnformasiya Agentliyi
Facebook
Tweeter
Whatsapp
