Azərbaycan News Agency

Bitcoin Asiya ticarət sessiyasında üç həftədir davam edən enişini sürdürərək hər coin üçün 93 min dollara düşüb – bu, 2025-ci ilin sentyabr ayının sonundan bəri ən aşağı göstəricidir.

Bitcoin oktyabr ayındakı ən yüksək səviyyəsindən bəri təxminən 25 faiz dəyər itirib ki, bu da ayı bazarının dərinləşdiyini göstərir. Ether avqustdakı 4 954 dollarlıq zirvəsindən bəri 35 faizdən çox dəyər itirib. Analitiklərə görə, satışlar ötən həftəyə nisbətən bir qədər səngisə də, bazar hələ də panik vəziyyətindədir.

Bitcoin təxminən 95 min 600 dollara qədər cüzi bərpa etsə də, yeddi gün ərzində ümumilikdə 10,2 faiz dəyər itirib. Beləliklə, Bitcoin 27 oktyabrda 116 min dollar səviyyəsindən təxminən 18 faiz, 7 oktyabrda 125 min 300 dollarlıq zirvədən isə 23,7 faiz geriləyib.

Bazar analitikləri bunun son aylardakı ən kəskin korreksiyalardan biri olduğunu bildirir və yalnız beş həftə ərzində 600 milyard dollardan çox bazar dəyərinin silindiyini vurğulayırlar. Hazırda Bitcoin-in bazar dəyəri təxminən 1,9 trilyon dollardır – 2025-ci ilin iyunundan bəri ən aşağı səviyyə.

Kripto bazarı ekspertləri psixoloji 100 min dollarlıq həddin aşağı qırılmasının bütün kriptovalyuta bazarında domino effekti yaratdığını qeyd edirlər.

Bu çərçivədə Ethereum üç həftə ərzində 25 faiz enərək 3 180 dollara düşüb. Solana 31 faiz dəyər itirib. Dogecoin 24 faiz azalıb. Bir çox digər token və “meme coin”lər də onlarca faiz dəyər itkisi yaşayib.

Bazar mütəxəssisləri tərəfindən hazırlanmış Qorxu və Tamah İndeksi 15–17 intervalına düşərək “çox yüksək qorxu” siqnalı verib və 2023-cü ilin mart ayından bəri ən aşağı səviyyəyə enib.