Azərbaycan News Agency

İsrailin Baş naziri Benjamin Netanyahu sosial media hesabında Binyamin bölgəsində baş verən hücumla bağlı açıqlama verib.

Netanyahu təhlükəsizlik qüvvələrinin hücumu törətdiyini bildirdiyi şəxsin tutulması üçün əməliyyat keçirdiyini deyib. Hücumdan sonra məsul şəxslərə və onlara kömək edənlərə qarşı tədbir görüləcəyini bildirən Netanyahu Qəzza, Livan və İordan çayının qərb sahilində əməliyyatların davam etdiriləcəyini qeyd edib.

Netanyahu İsrail ordusuna və Şin Betə İordan çayının qərb sahilində əlavə qüvvələrlə fəaliyyət göstərmək, blokadalar tətbiq etmək, əməliyyatlar keçirmək və həbslər həyata keçirmək barədə göstəriş verdiyini açıqlayıb.

İsrailin Baş naziri həmçinin hücumu törətdiyi bildirilən şəxsin evinin sökülməsi üçün müvafiq addımların atılması barədə göstəriş verdiyini bildirib.

Netanyahu açıqlamasında hücumda həyatını itirən şəxsin ailəsinə başsağlığı verib.

İsrail Baş nazirinin paylaşımı İordan çayının qərb sahilində gərginliyin davam etdiyi bir dövrə təsadüf edib. Reuters sentyabr ayında İordan çayının qərb sahilində məskunlaşanların hücumlarının və fələstinlilərlə israillilər arasında zorakılıq hallarının davam etdiyini bildirib.