Azərbaycan News Agency

Pakistan husilərin 29 sentyabr 2026-cı ildə Mədinədəki Taibah elektrik paylayıcı stansiyasına həyata keçirdiyi hücumu pisləyib.

Pakistanın yaydığı açıqlamada Həzrəti Məhəmmədin (s.ə.s.) Məscidini elektrik enerjisi ilə təmin edən infrastrukturun hədəfə alınmasının ciddi təxribat olduğu və dünya üzrə milyonlarla müsəlman üçün dərin narahatlıq və kədər mənbəyi yaratdığı bildirilib.

Açıqlamada İki Müqəddəs Məscidin toxunulmazlığına, ibadət edənlərin və zəvvarların təhlükəsizliyinə bütün hallarda hörmət göstərilməli olduğu vurğulanıb.

Bu cür düşünülməmiş hərəkətlərə dərhal və qeyd-şərtsiz son qoyulmasına çağırış edilən açıqlamada, həmin hücumların regional sülh və təhlükəsizlik üçün ciddi təhdid yaratdığı qeyd olunub.

Açıqlamada Pakistanın Səudiyyə Ərəbistanı ilə həmrəyliyinin davam etdiyi bildirilib və ölkənin suverenliyinə, ərazi bütövlüyünə və təhlükəsizliyinə tam dəstək ifadə olunub. Pakistanın Səudiyyə Ərəbistanının İki Müqəddəs Məscidi qorumaq, xalqının təhlükəsizliyini təmin etmək və zəvvarların təhlükəsizliyini qorumaq istiqamətindəki səylərinin yanında olduğu bildirilib.

Açıqlamada həmçinin Pakistanın regionda davamlı sülh və sabitliyin təmin olunması üçün səylərini davam etdirəcəyi qeyd edilib.