Azərbaycan News Agency

Qətər Xarici İşlər Nazirliyinin açıqlamasında Husi qrupunun Səudiyyə Ərəbistanının paytaxtı Ər-Riyadı ballistik raketlə hədəf almaq cəhdi, həmçinin Biş, Taif, Farasan və Yanbu şəhərlərində mülki şəxslərə və mülki obyektlərə hücum cəhdləri pislənib.

Açıqlamada bu hücumların düşmənçilik aktı olduğu və mülki şəxslərin həyatını qəbuledilməz şəkildə təhlükəyə atdığı bildirilib. Hücumların həmçinin Səudiyyə Ərəbistanının suverenliyinin və qaydalara əsaslanan beynəlxalq nizamın pozulması olduğu qeyd edilib.

Qətər Xarici İşlər Nazirliyi mülki şəxslərə və mülki obyektlərə qarşı hücumlara etirazını bir daha ifadə edərək bu cür hərəkətlərin dərhal dayandırılmasının vacibliyini vurğulayıb.

Açıqlamada Qətərin Səudiyyə Ərəbistanı ilə həmrəylik nümayiş etdirdiyi və ölkənin suverenliyini, təhlükəsizliyini, ərazi bütövlüyünü və maraqlarını qorumaq məqsədilə həyata keçirdiyi bütün qanuni tədbirləri dəstəklədiyi bildirilib.

Qətər Xarici İşlər Nazirliyi həmçinin Səudiyyə Ərəbistanının təhlükəsizliyinin Qətərin təhlükəsizliyinin ayrılmaz hissəsi və Körfəz Əməkdaşlıq Şurası ölkələrinin kollektiv təhlükəsizliyinin bir elementi olduğunu bəyan edib.