Azərbaycan News Agency

Hər iki ölkə qarşıdurmanı başlatmaqda bir-birini günahlandırır.

Tayland Silahlı Qüvvələri bildirib ki, Kamboca qüvvələrinin Ubon Ratchathani əyalətində açdığı atəş nəticəsində bir taylandlı əsgər həlak olub, daha yeddisi yaralanıb.

Tayland bombardmana cavab olaraq bazar ertəsi Kamboca ilə mübahisəli sərhəd boyunca müxtəlif hədəflərə hava zərbələri endirib.

Kamboca Müdafiə Nazirliyi isə kambocalı əsgərlərin ilk olaraq Preah Vihear və Oddar Meanchey sərhəd bölgələrində hücuma məruz qaldığını açıqlayıb.

Tayland rəsmiləri təxminən 35 min nəfərin təsirlənmiş sərhəd bölgələrindən təxliyə edildiyini bildirib.

Tayland və Kamboca arasında münasibətlər may ayında sərhədyanı qarşıdurmada bir kambocalı əsgərin güllələnərək öldürülməsindən sonra pisləşib. Bundan sonra avqust ayında ilk atəşkəs əldə olunana qədər mütəmadi toqquşmalar baş verib. Lakin tərəflər o vaxtdan bəri bir neçə dəfə yenidən toqquşublar.

Oktyabr ayında ABŞ prezidenti Donald Tramp tərəflər arasında yeni atəşkəsin vasitəçiliyini etmək üçün Malayziyada olub. Lakin bir aydan az müddət sonra tərəflər atəşkəsi dayandırıblar.