Azərbaycan News Agency

Hesabata görə, ABŞ-da əmək bazarı iyul ayında cəmi 73 min yeni iş yeri yaradıb ki, bu da gözləntilərdən xeyli aşağıdır. Əvvəlki aylara dair göstəricilər də yeni məlumatlara əsasən aşağı doğru yenilənib.

Tramp komissar Erika McEntarferi rəqəmləri manipulyasiya edərək hökumətə qarşı siyasi hücum təşkil etməkdə ittiham edib. Lakin bu barədə konkret sübut təqdim etməyib.

Truth Social-da yazan Tramp bildirib: “Bizə dəqiq məşğulluq rəqəmləri lazımdır. Komandama bu siyasi təyinatlı şəxsin dərhal işdən çıxarılması barədə göstəriş verdim.”

O, eyni günün axşamı əlavə edib: “Bu günkü məşğulluq rəqəmləri, məncə, Respublikaçıları və ABŞ-ı pis göstərmək üçün saxtalaşdırılıb.”

Qurum daha çox məlumat əldə etdikcə əvvəlki aylara dair statistikaları yeniləyir. Amma bu dəfəki yeniləmələr qeyri-adi dərəcədə kəskin idi: may ayı üzrə yaradılmış iş sayı 125 mindən 19 minə, iyun üzrə isə 147 mindən 14 minə endirildi.

Tramp tərəfindən 2019-cu ildə təyin olunan McEntarferin sələfi Uilyam Biç onun işdən çıxarılmasını qınadı. O, X platformasında yazdı: “BLS-də məni əvəz edən Dr. Erika McEntarfer-in tamamilə əsassız şəkildə işdən azad olunması təhlükəli presedent yaradır və qurumun statistik missiyasını sarsıdır.”

Biç əlavə edib: “Prezident pis iqtisadi xəbərlər üçün günahkar axtarır. Amma o, rəqəmlərə qərar vermir – sadəcə təqdim olunan məlumatları bildirir. Sayım prosesi müdaxilələrin qarşısını almaq üçün qəsdən mərkəzləşdirilməyib. BLS hər ay eyni sınaqdan keçmiş, şəffaf və etibarlı metodologiyadan istifadə edir. Əvvəlki iki ayın təxminləri daha dəqiq məlumatlar əsasında hər ay yenilənir.”