Azərbaycan News Agency

Mar-a-Lagoda bir saatdan çox davam edən mətbuat konfransında Tramp ikinci dövrünün gündəliyini, o cümlədən Panama Kanalı və Qrenlandiyanın nəzarətini geri almaq üçün ordudan istifadə etmək ehtimalını müzakirə etdi. O, həmçinin Meksika Körfəzinin adının "Amerika Körfəzi" olaraq dəyişdirilməsini təklif etdi.

Jurnalistin sualına cavab olaraq Tramp dedi: "Bunların heç birinə zəmanət verə bilmirəm. Amma deyə bilərəm ki, bunlar iqtisadi təhlükəsizliyimiz üçün vacibdir."

Tramp, 1999-cu ildə 1977-ci il sazişi əsasında Panamanın nəzarətinə verilən Panama Kanalının "Çin tərəfindən idarə olunduğunu" iddia etdi. Bu iddia onun strateji su yolunun ABŞ-ın nəzarətinə qaytarılması ilə bağlı təkrar çağırışlarından sonra səsləndi.

Tramp dedi: "Panama Kanalı ordumuz üçün tikilib. Baxın, Panama Kanalı ölkəmiz üçün həyati əhəmiyyət daşıyır. O, Çin tərəfindən idarə olunur. Çin! Biz isə Panama Kanalını Panamaya verdik, Çinə yox."

Qrenlandiyaya gəldikdə isə Tramp Danimarkaya iqtisadi sanksiyalar tətbiq etməklə hədələyib və əgər ölkə onun ərazi iddialarına qarşı çıxsa, "Danimarkaya çox yüksək tariflər tətbiq edəcəyini" bildirib.

Sərt çıxışında Tramp həmçinin Kanadanın ABŞ-ın ştatı kimi "iqtisadi inteqrasiyası" ilə maraqlandığını bildirib və Amerikanın ən yaxın müttəfiqlərindən birinə göstərilən hərbi dəstəyi tənqid edib.

Görüş zamanı Tramp ona qarşı "susdurma pulu" ilə bağlı cərimə və xüsusi müşavir Cek Smitin araşdırması daxil olmaqla, hüquqi işlərə də qarşı çıxdı. O, hakimin Smitin son hesabatını bloklamaq qərarını "böyük xəbər" adlandırdı. Tramp həmçinin 6 yanvar iğtişaşlarında zorakılıqda ittiham olunan iştirakçıları əfv etməyi nəzərdən keçirdiyini açıqladı.