Azərbaycan News Agency

Ukrayna Xarici İşlər Nazirliyi Hərbi Kəşfiyyat Günü münasibətilə yaydığı açıqlamada Ukrayna Müdafiə Kəşfiyyatının ölkənin müdafiəsindəki roluna diqqət çəkib.

Nazirlik Ukrayna Müdafiə Kəşfiyyatının şəhərlərin və müdafiə mövqelərinin qorunmasına, düşmənin hərəkətlərinin qabaqcadan müəyyənləşdirilməsinə və ölkənin müdafiəsi baxımından mühüm əməliyyatların həyata keçirilməsinə töhfə verdiyini bildirib.

Açıqlamada həyata keçirilən uğurlu əməliyyatların arxasında son dərəcə təhlükəli şəraitdə vəzifələrini yerinə yetirən şəxsi heyətin olduğu qeyd edilib.

Açıqlamada Ukrayna üçün vəzifələrini cəsarət, fədakarlıq və peşəkarlıqla yerinə yetirən bütün ukraynalı kəşfiyyatçılara təşəkkür edilib, ölkənin müdafiəsi zamanı həyatını itirənlər də yad olunub.

Ukrayna Xarici İşlər Nazirliyi həyatını itirən kəşfiyyatçıların xatirəsini ehtiramla yad edib və paylaşımını “Ukrayna hərbi kəşfiyyatına hörmətlə. Qəhrəmanlara eşq olsun!” sözləri ilə tamamlayıb.