Azərbaycan News Agency

Ukrayna Prezidenti Volodimir Zelenski Rusiyanın Kiyevdəki bir ofis binasına pilotsuz uçuş aparatı ilə həyata keçirdiyi hücum nəticəsində 4 nəfərin həlak olduğunu və 7 nəfərin yaralandığını bildirib. Yaralananlar arasında bir uşağın da olduğunu qeyd edən Zelenski həlak olanların ailələrinə başsağlığı verib.

Zelenski bu gün həmçinin McDonald’s tərəfindən istifadə olunan bir anbara pilotsuz uçuş aparatı ilə hücum edildiyini bildirib. Rusiyanın hücumlarını davamlı şəkildə genişləndirdiyini qeyd edən Zelenski ABŞ və digər ölkələrə məxsus müəssisələrin, məlumat mərkəzlərinin və internet provayderlərinin də hədəfə alındığını deyib.

Zelenski hücumların insanların ünsiyyət qurmaq, təhsil almaq və işləmək imkanlarına təsir göstərdiyini bildirərək beynəlxalq ictimaiyyətin buna cavab verməli olduğunu qeyd edib. O, uzaqmənzilli müdafiə imkanları ilə beynəlxalq sanksiyaların Rusiya üçün konkret nəticələr yaradacaq şəkildə birlikdə tətbiq edilməli olduğunu vurğulayıb.