Azərbaycan News Agency

Ukrayna Prezidenti Volodimir Zelenski Rusiyanın Zaporijyada yaşayış binalarına beş süzülən bomba ilə hücum etdiyini və hücum nəticəsində 12 nəfərin həyatını itirdiyini bildirib. Ölənlər arasında üç uşağın da olduğunu qeyd edən Zelenski 14 nəfərin yaralandığını, yaralılardan ikisinin vəziyyətinin kritik olduğunu deyib. O, həmçinin daha 12 nəfərin vəziyyətinin dəqiqləşdirilməsinə çalışıldığını bildirib.

Zelenski axtarış-xilasetmə işlərinin davam etdiyini, gecə ərzində Ukraynanın 13 bölgəsinin hücuma məruz qaldığını, yaşayış evlərinin, infrastrukturun və dəmir yolu obyektlərinin zərər gördüyünü bildirib.

Zelenski dizel ixracına tətbiq olunan sanksiyaların ləğv edilməsinin Rusiya tərəfindən hücumları davam etdirmək üçün siqnal kimi qəbul edildiyini iddia edərək, Rusiyanın müharibəni dayandırması üçün itkilərinin artmalı olduğunu deyib. O, Ukraynanın Rusiya hücumlarına cavab verəcəyini də bildirib.