Azərbaycan News Agency

ABŞ Dövlət Departamenti ictimai təhlükəsizliyi təhdid etdiyi bildirilən bəzi xarici vətəndaşların vizalarının ləğv edildiyini açıqlayıb.

Qurumun sosial media hesabında yayımlanan açıqlamada bildirilib ki, ABŞ administrasiyası "məsuliyyətsiz xarici sürücüləri" yollardan uzaq saxlamaq məqsədilə onların vizalarını ləğv edib və ölkəyə yenidən səfər etmələrinin qarşısını alıb.

Açıqlamada sərxoş vəziyyətdə avtomobil idarə etmə, yol hərəkəti qaydalarını pozma, zorakı davranışlar və digər cinayətlərlə əlaqəli olduğu bildirilən xarici vətəndaşlara dair nümunələr paylaşılıb.

Bildirilib ki, bir nəfər ictimai asayişi pozmaq, polisə zor tətbiq edərək müqavimət göstərmək, sərxoş vəziyyətdə avtomobil idarə etmək və ailədaxili zorakılıq ittihamı ilə saxlanılıb; başqa bir şəxs isə avtomobildə uşaq olduğu halda ağır sərxoş vəziyyətdə avtomobil idarə edib.

Departament həmçinin bəzi şəxslərin qanuni həddən xeyli yüksək alkoqol səviyyəsi ilə avtomobil idarə etdiyini və təhlükəli davranışlar nümayiş etdirdiyini bildirərək, onların vizalarının ləğv edildiyini açıqlayıb.

ABŞ Dövlət Departamenti bəyan edib ki, Tramp administrasiyası dövründə amerikalıların təhlükəsizliyini təhdid edən xarici vətəndaşların vizaları ləğv edilməyə davam ediləcək və ölkənin təhlükəsizliyi əsas prioritet olaraq qalacaq.