Azərbaycan News Agency

Son illərdə dünyada piylənmənin müalicəsində istifadə olunan GLP-1 və GLP-1/GIP törəməli arıqlama iynələri hər xəstədə eyni möcüzəvi təsiri göstərməyə bilər.

Uzman Dr. Burak Uzel klinik araşdırmalara və şəxsi müşahidələrinə əsaslanaraq bildirib ki, arıqlama iynələrinə cavab verməyən xəstələrin nisbəti 10–20 faiz arasında dəyişir. Uzel deyib: “Hər 5–10 xəstədən birində gözlənilən çəki itkisini müşahidə edə bilmirik. Bu hal çox vaxt xəstənin iradəsi ilə bağlı deyil, birbaşa bioloji faktorlar, doza tənzimləmələri və bədənin dərmana verdiyi reaksiya ilə əlaqəlidir.”

Dr. Uzel tibbi baxımdan xəstənin dərmana cavab vermədiyini demək üçün dəqiq meyarın olduğunu qeyd edərək belə izah edib: “Əgər 3 ay ərzində uyğun dozada dərman istifadə edilməsinə baxmayaraq bədən çəkisinin ən azı 5 faizi qədər azalma baş vermirsə, həmin şəxs ‘yaxşı cavab verməyən’ qrupuna daxil edilə bilər.”

Dr. Uzel həmçinin 2-ci tip diabeti olan xəstələrin, diabeti olmayan insanlarla müqayisədə adətən daha yavaş arıqladığını vurğulayıb. Bunun “dərman uğursuzluğu” olmadığını, gözlənilən bioloji fərq olduğunu bildirən Uzel, xəstələrin prosesi ruhdan düşmədən həkim nəzarəti altında idarə etməli olduqlarını deyib.

Dərmanların yan təsirlərinə də toxunan Dr. Uzel bildirib: “Ürəkbulanma, qusma kimi yan təsirlərə görə müalicəni davam etdirə bilməyən və ya bioloji olaraq heç bir cavab almayan xəstələrimiz ola bilər. Lakin bu dərmanlar nə ilk, nə də son seçimdir. Əgər bir müalicə üsulu nəticə vermirsə, həkiminiz sizi daha uyğun alternativə yönləndirəcək”, – deyə xəstələri mütəxəssis məsləhəti olmadan dərmanı dayandırmamaq və dozanı dəyişməmək barədə xəbərdar edib.

Sonda Uzman Dr. Burak Uzel qeyd edib ki, sağlamlıq texnologiyaları və müasir tibbin imkanları sayəsində hər bir fərdin öz biologiyasına ən uyğun müalicəyə çatması mümkündür.