Azərbaycan News Agency

Birləşmiş Ərəb Əmirlikləri (BƏƏ) 2027-ci ildə Əbu-Dabidə keçiriləcək Beynəlxalq Müdafiə Sərgisi (IDEX), Dəniz Müdafiəsi və Təhlükəsizliyi Sərgisi (NAVDEX) və Beynəlxalq Müdafiə Konfransına hazırlıq prosesinə rəsmən başlayıb.

BƏƏ Müdafiə Nazirliyinin açıqlamasına görə, tədbirlərin təşkilinə cavabdeh olan Ali Təşkilat Komitəsi ilk hazırlıq iclasını keçirib.

İclasda 25-29 yanvar 2027-ci il tarixlərində Əbu-Dabi Milli Sərgi Mərkəzində (ADNEC) keçiriləcək tədbirin hazırlıqları müzakirə olunub.

Tədbirlər BƏƏ Prezidenti Şeyx Məhəmməd bin Zayed Al Nəhyanın himayəsi altında keçiriləcək.

İclasa IDEX və NAVDEX Ali Təşkilat Komitəsinin sədri briqada generalı Əhməd Məhəmməd Əli bin Adi rəhbərlik edib.

ADNEC Qrupunun idarəedici direktoru və baş icraçı direktoru Humaid Matar Al Dhaheri, alt komitələrin sədrləri, eləcə də dövlət və özəl sektordan çoxsaylı qurumların nümayəndələri də iclasda iştirak ediblər.

Rəsmilər bildiriblər ki, IDEX və NAVDEX 2027 indiyədək keçirilmiş ən böyük tədbirlər kimi planlaşdırılır. Yüksək vəzifəli dövlət rəsmilərinin, qərar qəbul edən şəxslərin və dünyanın aparıcı müdafiə şirkətlərinin geniş beynəlxalq iştirakı gözlənilir.

Açıqlamada sərgilərin müdafiə imkanlarının inkişaf etdirilməsi, strateji tərəfdaşlıqların qurulması, qabaqcıl texnologiya və innovasiyaların təqdim edilməsi, eləcə də dəniz müdafiəsi və təhlükəsizliyi sahəsində qlobal aktorların bir məkanda birləşdirilməsi missiyasını gücləndirməyə davam edəcəyi vurğulanıb.