Azərbaycan News Agency

Birləşmiş Ərəb Əmirlikləri (BƏƏ) ilə Kanada arasında müdafiə sahəsində əməkdaşlıq sazişi imzalanıb. Sazişi BƏƏ-nin müdafiə məsələləri üzrə dövlət naziri Məhəmməd bin Mübarək bin Fadil Əl-Məzrui və Kanadanın müdafiə naziri Devid Makginti imzalayıblar. Əbu-Dabinin vəliəhdi Şeyx Xalid bin Məhəmməd bin Zayed Əl Nəhyan da imzalanma mərasiminə şahidlik edib.

Səfər çərçivəsində BƏƏ-nin müdafiə məsələləri üzrə dövlət naziri Əl-Məzrui Ottavada Kanadanın Müdafiə Nazirliyinin baş qərargahında kanadalı həmkarı Makginti ilə görüşüb. Görüşdə iki ölkə arasında müdafiə əməkdaşlığının gücləndirilməsi və ikitərəfli koordinasiyanın inkişaf etdirilməsi məsələləri müzakirə olunub.

Sazişin BƏƏ ilə Kanada arasında müdafiə tərəfdaşlığını dərinləşdirmək, qarşılıqlı maraqlara uyğun əməkdaşlığı inkişaf etdirmək və təcrübə mübadiləsini asanlaşdırmaq məqsədi daşıdığı bildirilib. Həmçinin qeyd olunub ki, bu razılaşma iki ölkənin təhlükəsizlik və sabitliyin dəstəklənməsi istiqamətində uzunmüddətli ikitərəfli münasibətlərini inkişaf etdirmək əzmini əks etdirir.