Azərbaycan News Agency

CCTV-nin məlumatına görə, Birləşmiş Millətlər Təşkilatı (BMT) Amerika Birləşmiş Ştatları (ABŞ) ilə İran arasında təxminən altı aydır davam edən münaqişənin sona çatdırılması üçün hər iki ölkəni diplomatiyaya çağırıb.

BMT münaqişənin regionun hüdudlarını aşan ağır humanitar və iqtisadi nəticələrə səbəb olduğu barədə xəbərdarlıq edərək, həll yolunun diplomatik vasitələrlə əldə oluna biləcəyini vurğulayıb.

BMT-nin Baş katibi Antonio Guterresin sözçüsü Stephane Dujarric ABŞ ilə İran arasında dayanmış diplomatik proseslə bağlı keçirilən mətbuat brifinqində açıqlamalar verib.

Dujarric davam edən münaqişənin altı ayı geridə qoymasının təəssüf doğuran hadisə olduğunu bildirib və yeganə həll yolunun diplomatiya olduğunu deyib. Dujarric həm ABŞ-ı, həm də İran İslam Respublikasını məzmunlu danışıqlarda iştirak etməyə çağırıb.

Dujarric BMT-nin Qətər, Pakistan, Misir, Səudiyyə Ərəbistanı və Küveyt tərəfindən aparılan vasitəçilik səylərini güclü şəkildə dəstəklədiyini bildirib.

BMT-nin Baş katibi Guterresin sözügedən ölkələrlə sıx təmasda olduğunu qeyd edən Dujarric diplomatik təşəbbüslərin münaqişənin sona çatdırılması baxımından mühüm əhəmiyyət daşıdığını vurğulayıb.

Dujarric diplomatik dalanın davam etməsinin yalnız mülki əhalinin əzablarını artırmayacağını, eyni zamanda münaqişənin qlobal iqtisadiyyat üzərində yaratdığı təzyiqi də dərinləşdirəcəyini bildirib.

Dujarric münaqişə zamanı müxtəlif dövrlərdə həyata keçirilən bombardmanların mülki infrastruktura zərər vurduğunu qeyd edərək, humanitar nəticələrlə yanaşı qlobal iqtisadi təsirlərin də ciddi miqyaslara çatdığını bildirib.

Dujarric münaqişənin təsirlərinin regionun hüdudlarından çox uzağa yayıldığını, qlobal ərzaq təchizatının, humanitar yardım çatdırılmasının və gübrə daşımalarının pozulduğunu bildirib. Enerji qiymətlərindəki artıma da diqqət çəkən Dujarric dünyanın iqtisadi baxımdan ən həssas ölkələrinin münaqişədən ciddi şəkildə təsirləndiyini qeyd edib.

Dujarric qlobal enerji ticarəti üçün kritik əhəmiyyət daşıyan Hörmüz boğazı ilə bağlı mexanizmin də yaxından izlənildiyini bildirib.

BMT-nin işçi qrupunun aidiyyəti tərəflərlə məsləhətləşmələri davam etdirdiyini təsdiqləyən Dujarric yaradılan çərçivənin texniki baxımdan nisbətən tez işə salına biləcəyini, lakin həyata keçirilməsi üçün bütün aidiyyəti ölkələrin razılığının lazım olduğunu deyib.

ABŞ və İsrail fevralın 28-də İrana qarşı hərbi hücumlara başlayıb. İran isə cavab olaraq İsraili və ABŞ-ın Körfəz bölgəsindəki hərbi bazalarını hədəfə alıb.

Münaqişədən sonra qlobal enerji ticarəti baxımından strateji əhəmiyyət daşıyan Hörmüz boğazı böyük ölçüdə bloklanıb və neftlə digər əmtəələrin daşınmasında ciddi fasilələr yaranıb.

ABŞ ilə İran arasında iyunun 18-də iki ölkənin yekun razılığa gəlməsi məqsədilə 60 gün ərzində danışıqların aparılmasını nəzərdə tutan anlaşma memorandumu imzalanmışdı.

Lakin iki ölkə arasında gərginliyin yenidən artmasından sonra danışıqların gələcəyi qeyri-müəyyən olaraq qalır. BMT tərəfləri yenidən diplomatik prosesə qayıtmağa və məzmunlu danışıqları davam etdirməyə çağırır.