Azərbaycan News Agency

UNICEF-in sözçüsü Conatan Kriks gecə boyunca hava şəraitinin “dəhşətli” olduğunu və yağışın o qədər güclü yağdığını bildirib ki, ofisinin yaxınlığında suyun səviyyəsi 15 santimetrə çatıb.

O, nəm paltarlarla çadırlarda və müvəqqəti sığınacaqlarda yaşayan uşaqların hipotermiya və digər xəstəliklərə məruz qalmasından ciddi narahatlığını ifadə edib.

HƏMAS-ın nəzarətində olan Qəzza Səhiyyə Nazirliyi bir körpənin hipotermiyadan öldüyünü, ağır hava şəraiti nəticəsində baş verən bina uçqunlarında isə azı 11 nəfərin həlak olduğunu açıqlayıb.

BMT qurumları Qəzzada doqquz həftə əvvəl başlayan atəşkəsdən sonra çadır, yorğan və geyimlərin çatdırılmasını artırıb, lakin yardımın hələ də kifayət etmədiyini bildirirlər.

BMT və tərəfdaşları indiyədək təxminən 55 min ailənin yağışlardan zərər çəkdiyini hesablayır.

Bazar ertəsi və çərşənbə axşamı yağan güclü yağışlardan sonra 40-dan çox fövqəladə sığınacaq ciddi şəkildə su altında qalıb və bir çox insan yenidən köçməyə məcbur olub.