Azərbaycan News Agency

BMT Təhlükəsizlik Şurası sentyabrın 17-də ABŞ tərəfindən təqdim edilən İran üzrə Sanksiyalar Komitəsinin Ekspertlər Qrupunun mandatının uzadılmasına dair qətnamə layihəsini səsverməyə çıxarıb. Rusiya və Çin səsvermədə “xeyr” səsi verib və qətnamə layihəsi rədd edilib.

BMT Baş Assambleyasının 81-ci sessiyası isə dünən Təhlükəsizlik Şurasının daimi üzvlərinin veto hüququndan istifadəsinə dair ümumi iclas keçirib.

Çinin BMT-dəki daimi nümayəndəsinin müavini Sun Lei iclasda çıxışı zamanı gərginliyi artıran və danışıqları sarsıdan bütün addımların rədd edilməli olduğunu bildirib. Sun gərginliyin azaldılmasına və diplomatik səylərə kömək edən hər bir fürsətdən istifadə edilməli olduğunu deyib.

Sun Lei bildirib ki, ABŞ-ın hərtərəfli nüvə sazişindən birtərəfli qaydada çıxması, İrana qarşı maksimum təzyiq tətbiq etməsi və danışıqlar prosesi zamanı İrana qarşı iki dəfə hərbi gücdən istifadə etməsi İranın nüvə probleminin hazırkı çətin vəziyyətə düşməsinin əsas səbəbidir.

Sun qeyd edib ki, İranın nüvə probleminin tarixinin təhrif edilməsi, İrana qarşı sanksiyaların yenidən tətbiqi və mübahisəli qətnamə layihəsinin səsverməyə çıxarılmasında israr edilməsi Təhlükəsizlik Şurasının birliyinə və nüfuzuna zərər vuracaq, həmçinin bu təşəbbüslər diplomatik səylərə mane olacaq.

Sun Lei vurğulayıb ki, Çin İranın nüvə probleminin siyasi həllini dəstəkləmək, nüvə silahlarının yayılmasının qarşısının alınması ilə bağlı narahatlıqları müvafiq şəkildə həll etmək və Yaxın Şərqdə davamlı sülhü qorumaq məqsədilə “xeyr” səsi verib.