Azərbaycan News Agency

Pakistanın xarici işlər naziri Ishaq Dar Somali sahillərində qaçırılan MV Honour 25 gəmisindəki pakistanlı ekipaj üzvləri ilə bağlı açıqlama verib.

Dar Xarici İşlər Nazirliyi və Pakistanın Cibutidəki səfirliyinin apardığı işlər nəticəsində gəmidə olan 10 pakistanlı ekipaj üzvündən Yasir Khan, Aqeel Khan, Amin bin Shams və Usman Ghaninin təhlükəsiz şəkildə xilas edildiyini bildirib. O, dörd ekipaj üzvünün oktyabrın 3-də Karaçiyə çatmasının planlaşdırıldığını qeyd edib.

Həyatını itirən Rafi Ullah Khan, Syed Kashif Umer və Mahmood Ahmed Ansarinin cənazələrinin Pakistana göndərildiyini bildirən Dar, prosesin sürətləndirilməsi məqsədilə zəruri hüquqi və digər prosedurların davam etdirildiyini qeyd edib.

Dar kapitanla birlikdə Imran Ali, Yasin Muhammad və Syed Yousuf Hussain adlı daha 3 pakistanlı ekipaj üzvünün gəmidə qaldığını bildirib. O, bu şəxslərin təhlükəsiz şəkildə gəmidən çıxarılması və mümkün qədər tez Pakistana qayıtması üçün dost ölkələrlə koordinasiyanın davam etdirildiyini açıqlayıb.

Pakistan Xarici İşlər Nazirliyinin Baş nazir Shehbaz Sharifin rəhbərliyi altında məsələni yaxından izlədiyini bildirən Dar, həyatını itirənlərin cənazələri də daxil olmaqla bütün Pakistan vətəndaşlarının mümkün qədər tez ölkəyə qaytarılması üçün işlərin davam etdiyini və zərər çəkmiş ailələrə lazımi dəstəyin göstərilməsinin davam etdiriləcəyini vurğulayıb.