Azərbaycan News Agency

CCTV-nin məlumatına görə, Çinin xarici işlər naziri Van İ və Pakistanın baş nazirinin müavini və xarici işlər naziri Məhəmməd İshaq Dar ABŞ ilə İran arasında artan gərginlikdən sonra Şanxayda görüşüblər.

Görüş zamanı tərəflər münaqişələrin dayandırılmasına və danışıqların bərpasına çağırıblar.

Çin və Pakistan İrandakı vəziyyətin pisləşməsindən dərin narahatlıqlarını ifadə ediblər. Tərəflər aidiyyəti ölkələri düşmənçilikləri dərhal dayandırmağa, gərginliyi artıracaq addımlardan çəkinməyə və kommunikasiya kanallarını açıq saxlamağa çağırıblar.

Van İ bildirib ki, iyun ayında ABŞ ilə İran arasında əldə olunan ilkin mərhələli anlaşma memorandumu asanlıqla əldə edilməyib və ikitərəfli danışıqların nəticəsi olub.

O qeyd edib ki, Pakistanın koordinasiya və vasitəçilik rolu, eləcə də beynəlxalq ictimaiyyətin birgə səyləri razılaşmanın əldə olunmasına töhfə verib.

Van bildirib ki, memorandumun əsas müddəaları həm tərəflərin uzunmüddətli maraqlarına, həm də beynəlxalq ictimaiyyətin gözləntilərinə cavab verir və bütün tərəfləri öhdəliklərinə və razılaşmanın şərtlərinə əməl etməyə çağırıb.

O əlavə edib ki, Çin Pakistanın vasitəçilik səylərini dəstəkləməyə davam edəcək və gərginliyin azaldılması istiqamətində konstruktiv rol oynayacaq.

İshaq Dar isə Pakistanın son təşəbbüsləri barədə Van İyə məlumat verib.

Çinə anlayış və dəstəyinə görə təşəkkür edən Dar bildirib ki, Pakistan çətinliklərə baxmayaraq sülh danışıqlarını fəal şəkildə təşviq etməyə davam edəcək.