Azərbaycan News Agency

Fələstinin Xarici İşlər və Mühacirlər Nazirliyi Birləşmiş Millətlər Təşkilatının Baş Assambleyasında keçirilən İnsan Hüquqları Şurasına üzvlük seçkilərinin nəticələri ilə bağlı bəyanat yayıb. Nazirlik seçilən ölkələri təbrik edərək, xüsusilə İordaniya və Küveytin üzvlüyə seçilməsindən məmnunluq duyduğunu bildirib.
　
Bəyanatda İnsan Hüquqları Şurasının insan hüquqlarının müdafiəsi və təşviqindəki mühüm roluna diqqət çəkilərək, yeni seçilmiş üzvlərlə ədalət, bərabərlik və beynəlxalq hüquqa hörmət prinsipləri çərçivəsində əməkdaşlığın davam etdirilməsinin hədəfləndiyi qeyd olunub.
　
Fələstinin Xarici İşlər və Mühacirlər Nazirliyi Şuranın işğal altındakı Fələstin torpaqlarındakı insan hüquqları vəziyyətini izləməsinin, qərar və tövsiyələrinin icrasını təmin etməsinin və ağır pozuntulara görə məsuliyyət daşıyan şəxslərin cavabdehlik daşıması istiqamətindəki səyləri dəstəkləməsinin vacibliyini ifadə edib. Bəyanatda soyqırımı cinayəti də daxil olmaqla ağır pozuntuların araşdırılması və cəzasızlıq siyasətinə son qoyulması çağırışı edilib.
　
Nazirlik yeni dövrdə Şura üzvləri ilə əməkdaşlıq və koordinasiyanı gücləndirməyi, beynəlxalq hüququn tətbiqində ikili standartlara və selektivliyə qarşı çıxmağı, habelə Fələstin xalqının ayrılmaz hüquqlarının qorunmasını qarşıya məqsəd qoyduğunu vurğulayıb.