Azərbaycan News Agency

Ukraynanın xarici işlər naziri Andriy Sibiqa verdiyi açıqlamada Avropada Təhlükəsizlik və Əməkdaşlıq Təşkilatının Parlament Assambleyasına (ATƏT PA) və Coan Pons Pereyə Ukraynaya göstərdikləri dəstəyə görə təşəkkür edib. Sibiqa Rusiyanın enerji infrastrukturuna yönəlmiş hücumlarının mülki itkilərə və genişmiqyaslı elektrik kəsintilərinə səbəb olduğunu bildirib.
　
Sibiqa enerji sahəsində atəşkəs çağırışlarına Rusiyanın raket və pilotsuz uçuş aparatları ilə zərbələr endirərək cavab verdiyini vurğulayıb. O, Rusiyaya qarşı sanksiyaların yumşaldılması əvəzinə daha sərt sanksiyaların tətbiq edilməsinin və mövcud məhdudiyyətlərə daha ciddi nəzarət olunmasının vacibliyini qeyd edib.
　
Ukraynanın xarici işlər naziri ölkəsinin mülki vətəndaşları və strateji infrastrukturu qoruya bilməsi üçün daha çox hava hücumundan müdafiə sistemlərinə və zərərsizləşdirici raketlərə ehtiyacı olduğunu diqqətə çatdırıb.