Azərbaycan News Agency

Fələstin Xarici İşlər və Ekspatriantlar Nazirliyinin açıqlamasında İsrail hakimiyyətinin Qüds də daxil olmaqla işğal altındakı Fələstin ərazilərində fəaliyyət göstərən holland diplomatlara qarşı tətbiqlərinin diplomatik fəaliyyətin həyata keçirilməsinə mane olacağı bildirilib.

Açıqlamada holland diplomatların Fələstin ərazilərində məmnuniyyətlə qarşılandığı qeyd olunaraq, İsrail hakimiyyətinin ölkələrin mövqelərinə təsir göstərmək və Fələstində beynəlxalq diplomatik mövcudluğu azaltmaq məqsədilə təzyiq və hədələr tətbiq etdiyi iddia edilib.

Fələstin administrasiyası Niderlandla ikitərəfli münasibətlərin əhəmiyyətini vurğulayaraq, Fələstin xalqının öz müqəddəratını təyinetmə hüququnu və iki dövlətli həlli dəstəkləyən ölkələrə dəstəyini ifadə edib.

Fələstin Xarici İşlər və Ekspatriantlar Nazirliyi beynəlxalq ictimaiyyəti və qurumlarını İsrail hakimiyyətinin diplomatlara və beynəlxalq institutlara qarşı tətbiqləri qarşısında ortaq mövqe tutmağa çağırıb.