Azərbaycan News Agency

Çin Xalq Respublikasının Sədr müavini Han Zheng dün Nyu-Yorkda Birləşmiş Millətlər Təşkilatının (BMT) Baş Assambleyasının 81-ci sessiyası çərçivəsində BMT-nin Baş katibi Antonio Quterreşlə görüşüb.

Han görüş zamanı bu ilin Çin Xalq Respublikasının BMT-də Çinin yeganə qanuni nümayəndəsi kimi tanınmasının 55-ci ildönümü olduğunu xatırladıb. Çinin son 55 il ərzində həqiqi çoxtərəfliliyə sadiq qaldığını bildirən Han BMT-nin beynəlxalq məsələlərdə mərkəzi rol oynamasını dəstəklədiklərini deyib.

Çoxtərəfliliyin qorunmasının və qlobal idarəetmə sisteminin islahatlar yolu ilə təkmilləşdirilməsinin beynəlxalq ictimaiyyətin ortaq gözləntisinə çevrildiyini qeyd edən Han Çinin məsuliyyətli böyük dövlət kimi üzərinə düşən rolu oynamağa davam edəcəyini bildirib.

Han Çinin öz yanaşma və təşəbbüsləri ilə BMT gündəliyi arasında uyğunluğu gücləndirməyə davam edəcəyini, Çin üslublu modernləşmədə əldə olunan yeni irəliləyişlərlə dünya inkişafına yeni imkanlar təqdim edəcəyini qeyd edib.

Quterreş isə BMT-nin fəaliyyətinə göstərdiyi güclü dəstəyə görə Çinə təşəkkür edib. Çinin BMT gündəliyinin irəlilədilməsində mühüm rol oynadığını və qlobal inkişafa əhəmiyyətli töhfələr verdiyini bildirən Quterreş beynəlxalq ictimaiyyətin ortaq maraqlarını qorumaq məqsədilə Çinlə əməkdaşlığı daha da dərinləşdirməyə hazır olduqlarını deyib.

Han Zheng Nyu-Yorkdakı təmasları çərçivəsində Çinin ev sahibliyi etdiyi Qlobal İnkişaf Təşəbbüsünün 5-ci ildönümünə həsr olunan yüksək səviyyəli dialoqda da iştirak edib.

Han burada çıxışı zamanı Çinin Qlobal İnkişaf Təşəbbüsünün daha əhatəli və konkret şəkildə həyata keçirilməsi, inkişafın nəticələrindən bütün ölkələrin xalqlarının faydalanması və bəşəriyyətin ortaq gələcək birliyinin qurulmasının irəlilədilməsi üçün bütün tərəflərlə işləməyə hazır olduğunu bildirib.

BMT Baş katibinin müavini Amina J. Mohammed, Pakistanın Baş naziri Şahbaz Şərif, Maldiv adalarının vitse-prezidenti Hussain Mohamed Latheef, həmçinin Laosun Baş nazirinin müavini və xarici işlər naziri Thongsavanh Phomvihane də dialoqda çıxış ediblər.

Toplantıda 30-dan çox ölkədən nazir səviyyəli rəsmilərlə yanaşı, 60-dan çox ölkə və 20-dən artıq beynəlxalq təşkilatdan 300-dən çox nümayəndə iştirak edib.

Han Zheng həmçinin BMT Baş Assambleyasının 81-ci sessiyasının sədri Khalilur Rahman ilə görüşüb. Çinin dayanıqlı inkişafın Baş Assambleyanın bu sessiyadakı fəaliyyətinin prioritet gündəm məsələlərindən biri kimi müəyyənləşdirilməsini dəstəklədiyini bildirən Han inkişaf sahəsində əldə ediləcək konkret nəticələrlə dünya xalqlarının gözləntilərinə cavab verilməsinə çağırıb.