Azərbaycan News Agency

CCTV-nin məlumatına görə, İran İslam İnqilabı Keşikçiləri Korpusunun (SEPAH) Hərbi Dəniz Qüvvələri Hörmüz boğazında neft tankerinin dəniz minasına çırpılmasından sonra baş verən partlayışı əks etdirən görüntülər yayımlayıb.

SEPAH xam neft daşıyan tankerin bütün naviqasiya sistemlərini söndürdüyünü və boğazdan icazəsiz marşrutla çıxmağa çalışdığını bildirib. Tankerin dəniz minasına çırpılmasından sonra güclü yanğının baş verdiyi qeyd olunub.

SEPAH şənbə günündən bəri Hörmüz boğazında icazəsiz dəniz marşrutu ilə hərəkət edən üçüncü supertankerin minaya çırpılaraq alovlandığını açıqlayıb.

SEPAH həmçinin Hörmüz boğazında naviqasiya və mövqetəyinetmə sistemlərini söndürən bütün gəmilərin düşmən hədəfi kimi qiymətləndiriləcəyini və onlara qarşı “sərt və qətiyyətli” tədbirlər görüləcəyini bildirib.