Azərbaycan News Agency

İsrail Müdafiə Qüvvələri (IDF) qadınların zirehli manevr bölmələrində xidmət etməsinə dair planlaşdırılan pilot proqramın qiymətləndirilməsi üçün yüksək səviyyəli hazırlıq iclası keçirib.

IDF-in açıqlamasına görə, iclas Baş Qərargah rəisi general-leytenant Eyal Zamirin rəhbərliyi ilə, Quru Qoşunları komandanı general-mayor Nadav Lotan və digər yüksək rütbəli komandirlərin iştirakı ilə keçirilib.

İclasda qadınların zirehli manevr bölmələrində xidmət etməsinə dair pilot proqramın detalları müzakirə olunub. Baş Qərargah rəisi Zamir mövcud təhlükəsizlik şəraiti və əməliyyat ehtiyacları fonunda hər bir döyüşçüyə ehtiyac olduğunu bildirib və döyüş vəzifələrində xidmət edən qadın hərbçilərin peşəkarlığını və motivasiyasını yüksək qiymətləndirib.

Açıqlamada proqramın uğurunun iki əsas meyarla qiymətləndiriləcəyi qeyd olunub: birincisi, qadın personalın əməliyyat standartlarına zərər vermədən tələb olunan peşə səviyyəsinə çatması, ikincisi isə tam təlimdən sonra təhlükəsizlik və döyüş vəzifələrini yerinə yetirə biləcək əməliyyat bölməsinin yaradılmasıdır.

IDF həmçinin qadın və kişi hərbçilərin tank heyətlərində birlikdə xidmət etməsinin planlaşdırılmadığını bildirib. Pilot proqram uğurlu olarsa, qadınlar ən azı bir taktiki bölmə səviyyəsində ayrıca strukturda xidmət edəcəklər.

Baş Qərargah rəisi Zamir təlim zamanı qadın hərbçilərin fiziki sağlamlığının qorunmasının vacibliyini vurğulayaraq əvvəlki pilotlarda yüksək yaralanma göstəricilərinin qəbul edilməz olduğunu qeyd edib.

IDF qiymətləndirmə prosesinin müəyyən meyarlar üzrə aparılacağını və proqramın noyabr çağırışından əvvəl formalaşdırılacağını açıqlayıb.