Azərbaycan News Agency

İsrail Müdafiə Qüvvələri yaydığı açıqlamada həftəsonu Qəzza zolağının şimalındakı Darac Tuffah bölgəsinə həyata keçirilən hücumda HƏMAS-ın hərbi qanadının üzvü Abdullah Məhəmməd Xamis Cabirin öldürüldüyünü bildirib.

Açıqlamada Cabirin müxtəlif silahların istehsalına kömək etdiyi, HƏMAS-ın istehsal bölməsinin fəaliyyətində mühüm rol oynadığı və təşkilatın yenidən qurulması və inkişafı proseslərində iştirak etdiyi iddia olunub.

İsrail ordusu həftəsonu keçirilən digər hücumlarda Darac Tuffah bölgəsində HƏMAS-ın hərbi qanadına bağlı bir qrupun rəhbəri olduğu bildirilən Macid Əhməd Mustafa Sabbahın, Cəbəliyyə bölgəsində isə HƏMAS-ın hərbi qanadının mühəndislik batalyonunda xidmət etdiyi bildirilən Əmir Bəşir Məhəmməd Horaninin öldürüldüyünü açıqlayıb.

Açıqlamada sözügedən şəxslərin son vaxtlar İsrail hərbçilərinə və mülki şəxslərinə qarşı hücum planları üzərində işlədikləri, həmçinin HƏMAS-ın hərbi potensialını yenidən formalaşdırmağa yönəlmiş fəaliyyətlərdə iştirak etdikləri iddia edilib. İsrail ordusu bu fəaliyyətlərin atəşkəsin sistematik şəkildə pozulması anlamına gəldiyini irəli sürüb.