Azərbaycan News Agency

İsrail Müdafiə Qüvvələri (IDF) gecə saatlarında üç İsrail vətəndaşının Hermon bölgəsinə çataraq sərhədi keçdiyini və Suriya ərazisinə daxil olduğunu açıqlayıb.

IDF-nin açıqlamasında bölgəyə göndərilən İsrail Müdafiə Qüvvələri bölməsinin sözügedən şəxsləri aşkar etdiyi və onları İsrail ərazisinə geri qaytardığı bildirilib.

Saxlanılan üç şəxsin müvafiq prosedurların həyata keçirilməsi üçün İsrail polisinə təhvil verildiyi qeyd olunub.

İsrail ordusu hadisənin bölgədə aparılan hərbi fəaliyyətlərə ciddi müdaxilə yaratdığını və orada xidmət edən hərbçilərin təhlükəsizliyini riskə atdığını bildirib.

Açıqlamada, “İsrail Müdafiə Qüvvələri əməliyyat fəaliyyətlərinə ciddi müdaxilə təşkil edən və bölgədə xidmət edən İsrail Müdafiə Qüvvələri əməkdaşlarının təhlükəsizliyinə təhlükə yaradan bu hadisəni qətiyyətlə pisləyir” ifadələrinə yer verilib.

IDF həmçinin hüquq-mühafizə orqanlarının hadisə ilə bağlı hərtərəfli araşdırma aparmalı və sözügedən şəxslərin oxşar hərəkəti yenidən törətməsinin qarşısını almaq üçün zəruri sanksiyaların tətbiq edilməli olduğunu bildirib.