Azərbaycan News Agency

Niderlandın Baş naziri Rob Jetten qabaqcıl süni intellekt modellərinin idarə olunması ilə bağlı beynəlxalq əməkdaşlığın gücləndirilməsinə və daha çox nəzarətin təmin edilməsinə çağırıb.

Jetten sosial media hesabında verdiyi açıqlamada süni intellektin həyat keyfiyyətini yaxşılaşdırmaq, elmi inkişaf etdirmək və iqtisadiyyatları gücləndirmək potensialına malik olduğunu bildirib.

Lakin o qeyd edib ki, sərhədləri genişləndirən güclü süni intellekt modellərinin sürətli inkişafı düzgün idarə olunmadığı təqdirdə ciddi risklər də daşıyır.

Süni intellektin inkişaf istiqamətinin böyük ölçüdə az sayda şirkət və ölkə tərəfindən müəyyən edildiyinə diqqət çəkən Jetten bu vəziyyətin daha ədalətli hala gətirilməli olduğunu vurğulayıb.

Demokratik legitimliyin və ictimai marağın əsas götürülməli olduğunu bildirən Jetten bu məqsədlə bir çox ölkənin nümayəndələri ilə birlikdə qabaqcıl süni intellekt modelləri üzərində daha çox nəzarəti nəzərdə tutan bəyanat imzaladığını açıqlayıb.

Jetten süni intellekt məsələsinin Birləşmiş Millətlər Təşkilatının Baş Assambleyası çərçivəsində Nyu-Yorkda da müzakirə ediləcəyini bildirib və Niderlandın digər ölkələrlə birlikdə təşkil edəcəyi tədbirdə süni intellektin insan rəhbərliyi, nəzarəti və idarəsi altında qalmalı olduğunu müdafiə edəcəklərini qeyd edib.

Açıqlamada süni intellekt texnologiyalarının hazırlanması və istifadəsinin beynəlxalq hüquq çərçivəsində həyata keçirilməsinin vacibliyi də vurğulanıb.