Azərbaycan News Agency

Xorvatiyanın Baş naziri Andrej Plenkovic Qadınlara Qarşı Zorakılıqla Mübarizə Milli Günü münasibətilə paylaşımında qadınların qorunmasının ədalətli və təhlükəsiz cəmiyyətin əsas elementlərindən biri olduğunu bildirib.

Plenkovic qadınlara qarşı zorakılığın heç bir şəkildə əsaslandırıla bilməyəcəyini və buna dözümlülük göstərilməməli olduğunu deyib.

Qadınlara qarşı zorakılıqla mübarizə sahəsində Xorvatiya hökuməti ilə vətəndaş cəmiyyəti təşkilatları arasında dialoq çərçivəsində hüquqi tənzimləmələrdə irəliləyiş əldə edildiyini bildirən Plenkovic cəzaların sərtləşdirildiyini, məişət zorakılığı qurbanlarının vəziyyətinin yaxşılaşdırıldığını və yeni cinayət növlərinin qanunvericiliyə əlavə olunduğunu qeyd edib.

Plenkovic qadının ağır şəkildə öldürülməsi cinayətinə görə 40 ilədək həbs cəzasının nəzərdə tutulduğunu bildirib.

O qeyd edib ki, qoruyucu tədbirlərin tətbiqi zamanı zorakılığın təkrarlanması ilə bağlı risk faktorları və zərərçəkənin ehtiyaclarının qiymətləndirilməsinin nəticələri nəzərə alınır.

Plenkovic qoruyucu tədbirlərin pozulması halında şübhəlinin saxlanılmasının və 24 saat ərzində həbs edilməsinin mümkün olduğunu bildirib və hökumətin qadınlara qarşı zorakılıqla mübarizə üçün tədbirlər görməyə davam edəcəyini qeyd edib.

Plenkovic həmçinin qadınların özlərini təhlükəsiz və bərabər hiss etdikləri bir cəmiyyətin yaradılmasının hər kəsin məsuliyyəti olduğunu vurğulayıb.