Azərbaycan News Agency

Kallas qeyd edib ki, Avropa İttifaqı Rusiya aktivlərinin vaxt məhdudiyyəti olmadan dondurulması qərarını verib.

Onun sözlərinə görə, bu qərar Rusiyanın Ukraynaya vurduğu zərərə görə kompensasiyanı tam ödəyənədək Rusiyaya məxsus 210 milyard avroyadək vəsaitin Aİ ərazisində saxlanılmasını təmin edir.

“Rusiya danışıqlar prosesini ciddiyə alana qədər təzyiqi artırmağa davam edirik. Gələn həftə keçiriləcək Avropa Şurasının iclası Ukraynanın qarşıdakı illər üçün maliyyə ehtiyaclarının təmin olunması baxımından böyük əhəmiyyət daşıyacaq”, – deyə Kallas bildirib.

Avropa Komissiyasının sədri Ursula fon der Lyayen şuranın Rusiyaya məxsus suveren aktivlərin dondurulmasının davam etdirilməsinə dair təklifləri qəbul etməsini məmnunluqla qarşılayıb.

Fon der Lyayen deyib: “Bu barbar hücum müharibəsi davam etdiyi müddətdə Rusiyaya yönəlik xərclərin artmağa davam edəcəyinə dair güclü mesaj veririk. Bu, eyni zamanda Ukraynaya güclü bir mesajdır: cəsur qonşumuzun həm döyüş meydanında, həm də danışıqlar masasında daha da güclənməsini istəyirik.”

Aİ Şurasının sədri Antonio Kosta bildirib: “Oktyabr Avropa Şurasında Aİ liderləri Rusiyanın Ukraynaya qarşı apardığı hücum müharibəsini dayandırana və vurduğu ziyanı kompensasiya edənədək Rusiya aktivlərinin dondurulmuş vəziyyətdə saxlanılmasına dair öhdəlik götürmüşdülər. Bu gün həmin öhdəliyi yerinə yetirdik. Növbəti addım Ukraynanın 2026–27-ci illər üçün maliyyə ehtiyaclarının təmin olunmasıdır.”

Estoniyanın xarici işlər naziri Marqus Tsahkna isə deyib: “Dondurulmuş vəziyyətdə olan 210 milyard avro dəyərində Rusiya aktivləri Moskva müharibəni dayandırana və Ukraynaya vurduğu ziyanı ödəyənədək bloklanmış qalacaq. Avropa Ukraynanın yanında qətiyyətlə dayanır.”

Almaniya kansleri Fridrix Merts də bildirib: “Rusiya Mərkəzi Bankının aktivləri Rusiya hücum müharibəsinə son qoyana və Ukraynanı kompensasiya edənədək dondurulmuş vəziyyətdə qalacaq. İtaliya və Belçika ilə birlikdə demək olar ki, yekdilliklə qəbul edilmiş bu qərarın Avropa suverenliyinə dair güclü mesaj verməsindən məmnunam.”