Azərbaycan News Agency

Avropa İttifaqının Xarici Əlaqələr və Təhlükəsizlik Siyasəti üzrə Ali Nümayəndəsi Kaya Kallas Rəfah sərhəd-keçid məntəqəsindəki son vəziyyət və bölgədəki atəşkəs prosesi ilə bağlı açıqlama verib.

Sərhəd-keçid məntəqəsinin humanitar əhəmiyyətinə və Aİ-nin roluna diqqət çəkən Kallas deyib: “Rəfah sərhəd-keçid məntəqəsinin açılması sülh planında konkret və müsbət addımdır. Aİ-nin mülki missiyası sərhəd keçidlərini izləmək və fələstinli sərhəd mühafizəçilərinə dəstək vermək üçün ərazidə fəaliyyət göstərir”.

Kallas əlavə edib: “Qəzzadakı xəstələr və yaralılar üçün bu yenidən açılış bir xilasedici vasitədir. Uzun müddətdir ayrı düşmüş ailələrin yenidən bir araya gəlməsinə imkan yaradacaq”.

Prosesin davamlılığı və Qəzzanın gələcəyi barədə danışan Kallas sözlərini belə yekunlaşdırıb: “Bu cür praktik addımlar atəşkəs planının irəliləməsinə kömək edir və davam etməlidir. Eyni zamanda, Qəzza hələ də təcili yardıma ehtiyac duyur. Onun yenidən qurulması HƏMAS-ın silahsızlaşdırılmasından asılı olacaq”.