Azərbaycan News Agency

Avropa İttifaqı Şurasının Prezidenti Antonio Koşta verdiyi açıqlamada Avropa Mərkəzi Bankının prezidenti Kristin Laqardın 7 fevral 2027-ci ildə vəzifəsindən ayrılmaq niyyətini ona çatdırdığını bildirib. Koşta Laqardın qərarına hörmətlə yanaşdığını qeyd edərək, 2019-cu ilin noyabrından bəri prezident vəzifəsində göstərdiyi fədakarlığa görə ona təşəkkür edib.

Laqardın qeyri-müəyyənlik dövründə Avropa Mərkəzi Bankına rəhbərlik etdiyini bildirən Koşta qlobal pandemiya, Avropadakı müharibə, enerji böhranları və inflyasiya şokları zamanı avrozonada sabitliyin və dayanıqlığın qorunmasına töhfə verdiyini vurğulayıb.

Koşta Avropa Mərkəzi Bankının yeni prezidentinə səlahiyyətlərin problemsiz ötürülməsini təmin etmək məqsədilə Laqardın varisinin təyin olunması prosesinə bu gün başlanacağını və prosesin gecikdirilmədən davam etdiriləcəyini açıqlayıb. O, qərarın Avropa İttifaqının Fəaliyyəti haqqında Müqavilənin 283-cü maddəsinin 2-ci bəndində nəzərdə tutulan prosedura uyğun olaraq, Avropa İttifaqı Şurasının avrozona üzvlərindən ibarət tərkibi tərəfindən vaxtında qəbul edilməsinin hədəfləndiyini bildirib.