Azərbaycan News Agency

İsveçin Baş naziri Ulf Kristersson Milli Təhlükəsizlik Şurasının fövqəladə iclasından sonra açıqlama verib.

Kristersson bildirib ki, hər bir hökumətin ən mühüm vəzifəsi vətəndaşların təhlükəsizliyini təmin etməkdir. O qeyd edib ki, İsveç müdafiə sahəsində həyata keçirilən tarixi gücləndirmə tədbirləri və NATO üzvlüyü sayəsində, ətrafdakı qeyri-sabit mühitə baxmayaraq, son onilliklərin ən təhlükəsiz dövrlərindən birini yaşayır.

Kristersson bildirib ki, Almaniya hökumətinin əvvəlki axşam Leypsiq Hava Limanına qarşı uğursuz pilotsuz uçuş aparatı hücumuna görə Rusiyanı məsul tutmasından sonra Milli Təhlükəsizlik Şurası fövqəladə iclasa çağırılıb. O əlavə edib ki, iclasda İsveç Hərbi Kəşfiyyat və Təhlükəsizlik Xidməti (MUST) və İsveç Təhlükəsizlik Xidməti (Säpo) hökumətə Rusiya mənşəli hibrid təhdidlərlə bağlı qiymətləndirmələrini təqdim ediblər.

Kristersson qeyd edib ki, İsveç hökumətinin qiymətləndirməsinə əsasən, Leypsiqdəki hadisələr riskə getmək meylinin və ehtiyatsızlığın artdığı, intensivləşən Rusiya hibrid fəaliyyətləri modelinin bir hissəsi kimi qəbul edilməlidir.

Rusiyanın hərəkətlərinin məqsədinin Avropanın Ukraynaya dəstəyini zəiflətmək, cəmiyyətlər üzərində təzyiqi artırmaq, parçalanma və qorxu yaratmaq olduğunu bildirən Kristersson, “Rusiya uğur qazana bilməyəcək” deyib.

Kristersson İsveç hökumətinin Ukraynanı dəstəkləmək, Rusiyaya qarşı dayanmaq və ölkənin təhlükəsizliyi ilə müdafiəsini gücləndirmək məsələsində qətiyyətli mövqeyini davam etdirəcəyini bildirib.