Azərbaycan News Agency

Saç və dırnaq sağlamlığı üçün geniş istifadə olunan biotin (B7 vitamini) əlavələrinin qan analizi nəticələrini ciddi şəkildə yanlış göstərə biləcəyi barədə mütəxəssislər xəbərdarlıq ediblər.

Dr. Burak Uzel bildirib ki, qan verməzdən ən azı 2–3 gün əvvəl biotin istifadəsi dayandırılmalıdır.

Saç tökülməsinə qarşı tez-tez istifadə olunan biotin əlavələri bu gün bir çox multivitaminlərin tərkibində də yer alır.

Lakin biotin xəstəxanalardakı analiz cihazlarının ölçmə sistemləri ilə qarşılıqlı təsirə girərək analiz nəticələrinin səhv çıxmasına səbəb ola bilər.

Dr. Burak Uzel qeyd edib ki, biotin istifadəsi xüsusilə qalxanabənzər vəzin paneli (TSH, T3 və T4 göstəriciləri), D vitamini, paratormon (PTH) və infarktın diaqnozunda istifadə olunan bəzi kritik analizlərin nəticələrini poza bilər.

Laborator analizlərin etibarlılığı üçün xəstələrin məlumatlı olmasının vacibliyini vurğulayan Dr. Uzel bildirib ki, yanlış nəticələr lazımsız müalicələrə və ya mövcud xəstəliklərin gözdən qaçmasına səbəb ola bilər. “Bu səbəbdən qan analizi verməzdən əvvəl biotin tərkibli bütün əlavələrin istifadəsinə ən azı 2–3 gün ara verilməsini tövsiyə edirik”, – deyə o əlavə edib.

Bu hal bütün analiz cihazlarında eyni səviyyədə müşahidə olunmasa da, müəyyən ölçmə sistemləri ilə işləyən laboratoriyalarda səhv ehtimalı arta bilər. Sağlam diaqnostika prosesi üçün istifadə olunan əlavələr barədə həkimə məlumat verilməsinin unudulmaması tövsiyə olunur.

Ataköy Medicana Xəstəxanasında daxili xəstəliklər üzrə mütəxəssis kimi çalışan Dr. Burak Uzel eyni zamanda rəqəmsal patologiya və süni intellekt sahəsində tədqiqatlar aparan Virasoft şirkətinin Elmi Direktoru (CSO) vəzifəsini də icra edir.