Azərbaycan News Agency

Xorvatiyanın Baş naziri Andrej Plenkovic Birləşmiş Millətlər Təşkilatının (BMT) Baş Qərargahında keçirilən P4M Sammitində beynəlxalq nizamın kritik mərhələdən keçdiyini bildirib.

Plenkovic sammitdə çıxışı zamanı beynəlxalq hüquq və BMT Nizamnaməsinin sual altına alındığını qeyd edərək Rusiyanın Ukraynaya qarşı təcavüzünü buna nümunə göstərib. Plenkovic deyib: “BMT Nizamnaməsi bizə uyğun olan hissələri seçib götürə biləcəyimiz menyu deyil; o, hər kəs üçün və hər zaman keçərlidir.”

Xorvatiyanın “müasir suverenliyi” müdafiə etdiyini bildirən Plenkovic bunu demokratik dəyərlərə və beynəlxalq hüquqa əsaslanan, Avropa və qlobal tərəfdaşlarla güclü əlaqələri olan dövlət anlayışı kimi xarakterizə edib.

Çoxtərəfli əməkdaşlığın vətəndaşlara təhlükəsizlik və rifah, açıq və qaydalara əsaslanan ticarət, süni intellekt və kiberməkanın məsuliyyətli idarə olunması kimi konkret faydalar təmin etməli olduğunu vurğulayan Plenkovic, Xorvatiyanın sözügedən təşəbbüsə və çoxtərəfli əməkdaşlığın gücləndirilməsinə töhfə verməyə davam edəcəyini bildirib.