Azərbaycan News Agency

Rusiya Prezidenti Vladimir Putin Moskvada keçirilən Rusiya-Afrika İqtisadi və Humanitar Əməkdaşlıq Forumunun plenar iclasında çıxış edib.

Çıxışında çoxqütblü dünyanın dönməz şəkildə reallığa çevrildiyini vurğulayan Putin Afrikanın qlobal iqtisadiyyatın və siyasətin əsas qütblərindən biri kimi özünü getdikcə daha güclü şəkildə göstərdiyini bildirib. Putin deyib: “Qitə yeni oyanış dövrünü yaşayır: Onun suverenliyi möhkəmlənir, dünya səhnəsində təsiri və mövqeyi artır. Ən əsası isə afrikalılar öz maraqlarını müdafiə etməkdə sarsılmaz qətiyyətə, öz gələcəklərini formalaşdırmaq və inkişaf yollarını özləri seçmək istəyinə malikdirlər.”

Rusiyanı qlobal texnoloji suverenlik yarışında lider kimi xarakterizə edən Putin Afrika ilə ortaq maraqları vurğulayıb. O bildirib: “Bizim ortaq marağımız afrikalıların əlverişli qiymətə, dayanıqlı və ekoloji cəhətdən təmiz enerji mənbələrinə çıxışını yaxşılaşdırmaq, həmçinin Rusiyanın unikal texnologiyalara malik olduğu sahələr də daxil olmaqla, Afrikada yerli enerji bazarlarının inkişafına kömək etməkdir. Bu istiqamətdə işlər artıq aparılır. Afrikanın 16 ölkəsində 30-dan çox perspektivli enerji layihəsi birgə həyata keçirilir.”

Putin həmçinin Rusiyanın bütün Afrika ölkələri ilə ticarət, iqtisadi və humanitar əməkdaşlığın inkişafında maraqlı olduğunu bildirib.