Azərbaycan News Agency

Daxili xəstəliklər üzrə mütəxəssis dr. Burak Uzel cəmiyyətdə getdikcə artan piylənmə və xroniki yorğunluğun əsas səbəblərindən biri olan insulinə rezistentliklə bağlı açıqlama verib. Uzel vurğulayıb ki, sağlamlıq vəziyyətinin yalnız acqarına qan şəkərinin ölçülməsinə əsasən qiymətləndirilməsi aldadıcı ola bilər.

Dr. Uzel qeyd edib ki, bir çox insanın qan şəkəri dəyərləri normal aralıqda olsa da, çəki ata bilməmək, yeməkdən sonra yuxululuq və tez-tez şirniyyat istəyi müşahidə olunur. Bu halın bədənin şəkəri tarazlamaq üçün həddindən artıq insulin istehsal etməsindən qaynaqlana biləcəyini deyən Uzel, tibbdə bunun insulinə rezistentlik adlandırıldığını və qiymətləndirmədə insulin səviyyəsi ilə HOMA-IR indeksinin nəzərə alınmalı olduğunu vurğulayıb.

Analiz nəticələrinin düzgün şərh edilməsinin vacibliyinə toxunan Uzel bildirib ki, acqarına insulin səviyyəsi ideal olaraq 4–6 mU/L arasında olmalıdır, 10-dan yuxarı göstəricilər isə risk siqnalıdır. HOMA-IR üçün hədəf dəyərin təxminən 1 olduğunu, 1,5 və daha yüksək nəticələrin bədənin qan şəkərini idarə etməkdə çətinlik çəkdiyini göstərə biləcəyini qeyd edib.

Uzel əlavə edib ki, insulin ifrazının həddindən artıq artması ani şəkər enmələrinə səbəb ola, bu da hipoqlikemiya tutmaları və daimi aclıq hissi yaradaraq insanı qapalı bir dövrə sala bilər. Xüsusilə bel ətrafında yağlanması olan şəxslərin yalnız qan şəkərinin ölçülməsi ilə kifayətlənməməli olduğunu bildirən Uzel, insulin və HOMA-IR analizlərinin mütləq mütəxəssis həkim nəzarəti altında aparılmalı olduğunu deyib.

Dr. Burak Uzel Ataköy Medicana Xəstəxanasında daxili xəstəliklər üzrə mütəxəssis kimi çalışır. Eyni zamanda sağlamlıq və texnologiyanı birləşdirən layihələrdə iştirak edir və rəqəmsal platformalar vasitəsilə ictimai sağlamlıqla bağlı maarifləndirmə fəaliyyətləri aparır.