Azərbaycan News Agency

Qətər 2027-ci ilin mart ayında Ən Az İnkişaf Etmiş Ölkələr (LDC) üçün Doha Fəaliyyət Proqramının Aralıq İcmal Toplantısına (DPoA MTR) ev sahibliyi etməyi hədəflədiyini açıqlayıb.

BMT-nin Nyu-Yorkdakı qərargahında keçirilən tematik tədbirdə çıxış edən Qətərin BMT yanında daimi nümayəndəsi Şeyxa Alya Əhməd bin Seyf Al Tani bildirib ki, bu toplantı inkişaf məqsədləri və qlobal əməkdaşlıq baxımından mühüm platformadır.

Al Tani qeyd edib ki, ən az inkişaf etmiş ölkələr enerji təhlükəsizliyi, borc yükü, infrastruktur çatışmazlığı və iqlim dəyişikliyi qarşısında həssaslıq kimi çoxşaxəli problemlərlə üzləşirlər. O vurğulayıb ki, Doha Fəaliyyət Proqramı bu problemlərin həllində mühüm rol oynayır.

Al Tani əlavə edib ki, Qətər inkişaf etməkdə olan ölkələrə dəstəyini davam etdirəcək. Qətər İnkişaf Fondu vasitəsilə həyata keçirilən layihələr və ayrılan maliyyə vəsaitləri bu dəstəyin vacib hissəsini təşkil edir. O həmçinin ölkəsinin beynəlxalq inkişaf əməkdaşlığını daha da gücləndirəcəyini bildirib.