Azərbaycan News Agency

Qətər Xarici İşlər Nazirliyi Hörmüz boğazından keçən Birləşmiş Ərəb Əmirliklərinə məxsus iki neft tankerinin İran tərəfindən hədəfə alınması ilə bağlı açıqlama verib.

Nazirlik ADNOC-a məxsus iki tankerə hücumun beynəlxalq hüququn, dəniz naviqasiyası azadlığının və Birləşmiş Millətlər Təşkilatı Təhlükəsizlik Şurasının 2817 saylı qətnaməsinin pozulması olduğunu bildirib.

Açıqlamada Hörmüz boğazının təzyiq vasitəsi kimi istifadə edilməsinə qarşı çıxıldığı bildirilib və boğazın qeyd-şərtsiz yenidən açılmasına çağırış edilib.

Qətər Xarici İşlər Nazirliyi strateji əhəmiyyət daşıyan bu su yolunda naviqasiya azadlığının müzakirəyə açıq olmayan əsas prinsip olduğunu və boğazın bağlı qalmasının region ölkələrinin və qlobal iqtisadiyyatın maraqlarına mənfi təsir göstərdiyini bildirib.

Nazirlik həmçinin İranı region ölkələrinə məxsus aktivlərə hücumları dayandırmağa çağırıb, Birləşmiş Ərəb Əmirlikləri ilə həmrəy olduqlarını və BƏƏ-nin öz aktivlərini qorumaq üçün görəcəyi bütün tədbirləri dəstəklədiklərini bildirib.