Azərbaycan News Agency

Qətər Xarici İşlər Nazirliyinin yaydığı açıqlamada Husilərin Səudiyyə Ərəbistanının Mədinə şəhərində Məscid ən-Nəbəviyə və mülki obyektlərə xidmət göstərən elektrik paylayıcı stansiyasını hədəfə almasının pisləndiyi bildirilib. Açıqlamada hücumun İslamın müqəddəs məkanlarının toxunulmazlığına ciddi hücum, müsəlmanların hisslərinə qarşı açıq təxribat və mülki şəxslərin həyatına etinasızlıq olduğu vurğulanıb.

Açıqlamada qeyd olunub ki, sözügedən hücum Səudiyyə Ərəbistanının suverenliyinin pozulması və beynəlxalq hüquq qaydalarının açıq şəkildə pozulmasıdır. Qətərin müqəddəs məkanlara, mülki obyektlərə və mülki şəxslərə qarşı hücumları qəti şəkildə rədd etdiyi bildirilib.

Qətər Xarici İşlər Nazirliyi bu məsuliyyətsiz əməllərin dərhal dayandırılmasının vacibliyini vurğulayıb, Səudiyyə Ərəbistanı ilə tam həmrəylik içində olduqlarını və ölkənin suverenliyini, təhlükəsizliyini, ərazi bütövlüyünü və maraqlarını qorumaq üçün gördüyü qanuni tədbirləri dəstəklədiklərini bildirib. Açıqlamada həmçinin Səudiyyə Ərəbistanının təhlükəsizliyinin Qətərin təhlükəsizliyinin və Körfəz Əməkdaşlıq Şurasına üzv ölkələrin kollektiv təhlükəsizlik sisteminin ayrılmaz hissəsi olduğu qeyd edilib.