Azərbaycan News Agency

Qətər Xarici İşlər Nazirliyi İsrail qüvvələrinin işğal altındakı Şərqi Qüdsdə Birləşmiş Millətlər Təşkilatının Fələstinli Qaçqınlara Yardım Agentliyinə (UNRWA) bağlı Qalandiya Təlim Mərkəzinə daxil olmasını pisləyib.

Nazirliyin açıqlamasında sözügedən hərəkətin beynəlxalq humanitar hüququn açıq şəkildə pozulması və beynəlxalq iradəyə ciddi çağırış olduğu bildirilib.

Açıqlamada İsrailin UNRWA-nı sistemli şəkildə hədəf almasının agentliyin fəaliyyətinə son qoymaq və Qəzza zolağı, İordan çayının qərb sahili, İordaniya, Suriya və Livandakı milyonlarla fələstinlinin əsas xidmətlərə çıxışını əngəlləmək məqsədi daşıdığı irəli sürülüb.

Qətər Xarici İşlər Nazirliyi beynəlxalq ictimaiyyəti UNRWA obyektlərini qorumaq və İsrailin hərəkətlərinə qarşı addım atmaq üçün təcili fəaliyyətə çağırıb.

Açıqlamada həmçinin Qətərin UNRWA-ya tam dəstəyini davam etdirdiyi bildirilib və Fələstin xalqının qanuni hüquqlarına dəstəyin davam etdiyi vurğulanıb. Qətər Fələstin dövlətinin 1967-ci il sərhədləri əsasında və paytaxtı Şərqi Qüds olmaqla qurulmasına dair mövqeyini bir daha təsdiqləyib.