Azərbaycan News Agency

Qətər ukraynalı uşaqların, saxlanılan mülki şəxslərin və hərbi əsirlərin geri qaytarılmasına dair İkinci Beynəlxalq Konfransda iştirak edib. Sentyabrın 28-29-da Kanadanın Toronto şəhərində keçirilən konfransda Qətəri Beynəlxalq Əməkdaşlıq üzrə Dövlət Naziri Maryam bint Ali bin Nasser Al Misnad təmsil edib.

Qətərin konfransdakı açıqlamasında Rusiya-Ukrayna böhranının sülh yolu ilə həllinə yönəlmiş beynəlxalq səylərin dəstəkləndiyi və böhranın yalnız dialoq və vasitəçilik yolu ilə həll oluna biləcəyi bildirilib.

Açıqlamada Qətərin 2023-cü ildən etibarən Ukrayna və Rusiya tərəfləri ilə koordinasiya şəraitində münaqişə səbəbindən ailələrindən ayrı düşmüş uşaqların geri qaytarılmasına yönəlmiş 14-dən çox humanitar əməliyyata töhfə verdiyi və bu səylər nəticəsində 87 ukraynalı uşağın ailələrinə qovuşduğu qeyd olunub.

Qətərin 2023-cü ildə Ukraynadakı humanitar yardım fəaliyyətlərinə 100 milyon dollar, Ukraynanın taxıl ixracı təşəbbüsünə isə 20 milyon dollar dəstək verdiyi bildirilib. Açıqlamada həmçinin uşaqların müdafiəsi və təhsil layihələri çərçivəsində təhlükəsiz sığınacaqlar, məktəblər və uşaq bağçaları üçün 3,5 milyon dollarlıq təşəbbüsün dəstəkləndiyi, eləcə də ukraynalı tələbələrə 50 universitet təqaüdünün verildiyi qeyd edilib.