Azərbaycan News Agency

Qətərin Xarici İşlər Nazirliyi açıqlayıb ki, Baş nazir və xarici işlər naziri Şeyx Məhəmməd bin Əbdürrəhman bin Casim Al Sani Misirin xarici işlər, beynəlxalq əməkdaşlıq və xaricdə yaşayan misirlilər üzrə naziri Bədr Abdulatı ilə telefon danışığı aparıb.

Tərəflər telefon danışığında iki ölkə arasında əməkdaşlıq münasibətlərini və bu əlaqələrin dəstəklənməsi, eləcə də daha da gücləndirilməsi yollarını müzakirə ediblər.

Onlar həmçinin regiondakı son hadisələri, gərginliyin azaldılmasına yönəlmiş diplomatik səyləri və təhlükəsizliklə sabitliyin gücləndirilməsi məqsədilə həyata keçirilən birgə koordinasiyanı nəzərdən keçiriblər.

Al Sani bütün tərəflərin dialoq və diplomatiyaya sadiq qalmasının, həmçinin ABŞ ilə İran arasında imzalanmış anlaşma memorandumu çərçivəsində əldə olunmuş razılaşmaların həyata keçirilməsinin vacibliyini vurğulayıb. O, Hörmüz boğazında gəmiçilik azadlığının qorunmasının regional təhlükəsizlik və sabitlik üçün zəruri olduğunu bildirib.

Açıqlamada qeyd olunub ki, Qətər gərginliyin azaldılması və regionda davamlı sülhün təmin olunmasına yönəlmiş bütün təşəbbüslərə dəstəyini bir daha təsdiqləyib.