Azərbaycan News Agency

Trive Yatırım-ın gündəlik forex təhlilində həftənin son ticarət günündə qlobal bazarların bütün diqqətinin ABŞ-ın sentyabr ayı üzrə kənd təsərrüfatı xaricində məşğulluq göstəricisinə yönəldiyi bildirilib.

Təhlildə Fed sədrinin müavini Jeffersonun inflyasiyanın uzun müddətdir yüksək səviyyədə qaldığını qəbul etməklə yanaşı, faiz dərəcələri ilə bağlı qiymətləndirmə aparmaq üçün vaxta ehtiyac olduğunu vurğuladığı qeyd edilib. Bu açıqlamaların oktyabrda yeni faiz artımı ilə bağlı gözləntiləri daha da zəiflətdiyi bildirilib.

Uzunmüddətli gəlirlərin 20 ildən artıq dövrün ən yüksək səviyyələrindən geri çəkildiyi qeyd olunan təhlildə ABŞ-ın 10 illik dövlət istiqrazlarının gəlirliliyinin 5,24 faizə düşdüyü bildirilib. Jeffersonun geosiyasi proseslər və güclü tələb səbəbindən inflyasiya ilə bağlı yüksəliş riskləri gördüyü, yüksək enerji qiymətlərinin davamlı artıma səbəb ola biləcəyindən narahat olduğu vurğulanıb.

ABŞ fond bazarlarında əvvəlki sessiyada S&P 500 indeksinin 0,19 faiz artaraq 7 min 666,45 bəndə yüksəldiyi, Dow Jones indeksinin isə demək olar ki, dəyişmədən bağlandığı bildirilib. Təhlildə səhər saatlarında S&P 500 fyuçerslərinin 0,18 faiz, Nasdaq 100 fyuçerslərinin isə 0,36 faiz yüksəldiyi qeyd olunub.

Trive Yatırım-ın təhlilində Türkiyə vaxtı ilə saat 15:30-da açıqlanacaq kənd təsərrüfatı xaricində məşğulluq göstəricisində 89 min nəfərlik artımın gözlənildiyi, orta saatlıq əməkhaqqının 0,3 faiz yüksələcəyi və işsizlik səviyyəsinin 4,1 faizdə sabit qalacağı bildirilib. Çərşənbə günü açıqlanan ADP məlumatlarında özəl sektor məşğulluğunun 90 min nəfər artdığı və gözləntiləri üstələdiyi qeyd olunub. Xüsusilə əməkhaqlarının gözləntilərdən daha güclü artmasının faiz artımı müzakirələrini yenidən gündəmə gətirə biləcəyi vurğulanıb.

Enerji bazarlarına dair təhlildə dekabr fyuçersli Brent neftinin 4,4 faiz artaraq 102,31 dollardan, WTI neftinin isə 2,7 faiz yüksələrək 92,87 dollardan bağlandığı qeyd olunub. Artımda ABŞ-ın Yaxın Şərqə üçüncü təyyarədaşıyan gəmi qrupunu göndərməsi və Çin neft emalı zavodlarının yanacaq ixracını növbəti bildirişədək dayandırmasının təsirli olduğu bildirilib.

Təhlildə regiondan xam neft axınının böyük ölçüdə müharibədən əvvəlki səviyyələrə qayıtdığı, neft qiymətlərindəki artımın bazarın mövcud təklifdən daha çox münaqişənin yenidən kəskinləşməsi ehtimalını qiymətləndirdiyini göstərdiyi bildirilib.

Təhlildə həmçinin Vaşinqtonda Trampın Fed İdarə Heyətinin üç üzvünü vəzifədən uzaqlaşdırmağa çalışa biləcəyi ilə bağlı müzakirələrin pul siyasətinin müstəqilliyi ilə əlaqəli risk mükafatını gündəmdə saxladığı qeyd olunub. Bildirilib ki, bu proses uzunmüddətli istiqrazlarda inflyasiya mükafatı baxımından da izlənilir.

Təhlildə SEC-in qeydiyyatdan keçmiş investisiya məsləhətçiləri və fondlar üçün kriptoaktivlərin saxlanmasına dair qayda təklifi yayımladığı, tənzimləmənin 60 günlük müzakirə mərhələsindən keçəcəyi qeyd olunub.