Azərbaycan News Agency

Monteneqronun Baş naziri Milojko Spajic Avropa İttifaqı ilə aparılan üzvlük danışıqlarında daha üç fəslin bağlandığını açıqlayıb. Spajic bununla bağlanan fəsillərin sayının 21-ə yüksəldiyini bildirib.

Spajic bağlanan 17, 18 və 19-cu fəsillərin iqtisadi idarəetmə, etibarlı dövlət siyasətlərinin hazırlanması və sosial tərəqqi sahələrini əhatə etdiyini bildirərək Avropa Komissiyasına və Aİ-nin 27 üzv dövlətinə təşəkkür edib.

Monteneqro hökumətinin danışıqların son mərhələsi üçün öz məsuliyyətində olan bütün öhdəlikləri yerinə yetirdiyini deyən Spajic prosesin başa çatdırılması üçün digər səviyyələrdə də razılığın əldə edilməli olduğunu qeyd edib.

Spajic Monteneqronun 2028-ci ildə Avropa İttifaqının tamhüquqlu üzvü olması hədəfi istiqamətində avropalı tərəfdaşlarla işləməyə davam edəcəklərini bildirib.