Azərbaycan News Agency

Estoniyanın xarici işlər naziri Marqus Tsahkna açıqlamasında Qara dənizdə artan qeyri-sabitliyin yeganə məsuliyyət daşıyan tərəfinin Rusiya olduğunu iddia edib. Tsahkna son bir həftə ərzində Bolqarıstan və Rumıniyanın ərazi sularına yaxın ərazilərdə ən azı beş ticarət gəmisinin pilotsuz uçuş aparatları ilə vurulduğunu, gəmilərin batdığını, dənizçilərin yaralandığını və insan itkilərinin baş verdiyini qeyd edib.

Ticarət gəmilərinə hücumların Rusiyanın dəniz ticarətini pozmaq, dəniz yollarını bağlamaq, mülki infrastrukturu və gəmiləri hədəfə almaq yolu ilə Ukraynanı təcrid etmək səylərinin nəticəsi olduğunu iddia edən Tsahkna Moskvanın hərəkətlərinin beynəlxalq hüququ və sərbəst gəmiçilik prinsipini açıq şəkildə pozduğunu bildirib.

Tsahkna hücumların qlobal təchizat zəncirlərini təhlükə altına aldığını, ərzaq təhlükəsizliyini təhdid etdiyini və regional sabitliyi zəiflətdiyini bildirərək, Rusiyanın məsuliyyətə cəlb olunmasının vacibliyini vurğulayıb.

Qara dənizin təhlükəsizliyinin Avropanın təhlükəsizliyi demək olduğunu qeyd edən Tsahkna Estoniyanın Avropa İttifaqındakı tərəfdaşları, NATO müttəfiqləri, Bolqarıstan və Rumıniya ilə sıx koordinasiya şəraitində fəaliyyət göstərdiyini bildirib.