Azərbaycan News Agency

CCTV-nin xəbərinə görə, Husilərin idarə etdiyi Al-Masirah televiziyası Səudiyyə döyüş təyyarələrinin Yəmənin Taiz əyalətindəki Mocha liman şəhərinə üç hava hücumu həyata keçirdiyini bildirib.

Hücumlarda 6 nəfərin həyatını itirdiyi, 8 nəfərin yaralandığı bildirilib.

Xəbərdə hava hücumlarının çərşənbə axşamı həyata keçirildiyi, Səudiyyə rəsmilərinin isə hadisə ilə bağlı hələlik açıqlama vermədiyi qeyd olunub.

Husi ordusunun sözçüsü Yahya Sarea da bazar ertəsi verdiyi açıqlamada Səudiyyə Ərəbistanının son gərginliyin başlamasından bəri 917 hava hücumu həyata keçirdiyini iddia edib.

Mocha şəhərinə hücumlar şənbə günü Ər-Riyaddakı Kral Xalid Beynəlxalq Hava Limanı yaxınlığında partlayışlar və qara tüstünün görüldüyünə dair xəbərlərdən sonra baş verib.

Husilər Səudiyyə Ərəbistanının paytaxtındakı “həssas obyektləri” hədəf aldıqlarını bildirsələr də, Səudiyyə rəsmiləri hər hansı hücumu təsdiqləməyiblər. Səudiyyə Ərəbistanı yalnız Ər-Riyada atılan ballistik raketin zərərsizləşdirildiyini açıqlayıb.

Regionda son gərginliyin bu ayın əvvəlində Husilərin Yəmənin cənub-qərbində Qırmızı dəniz sahili boyunca irəliləməsindən sonra yaşandığı bildirilib.

Yəməndəki münaqişə Husilərin 2014-cü ilin sonunda paytaxt Səna və Yəmənin şimalının böyük hissəsinə nəzarəti ələ keçirməsi ilə başlayıb, Səudiyyə Ərəbistanının rəhbərlik etdiyi koalisiya isə 2015-ci ilin martında beynəlxalq səviyyədə tanınan Yəmən hökumətini dəstəkləmək məqsədilə müdaxilə edib.