Azərbaycan News Agency

Yunanıstan Xarici İşlər Nazirliyi Türkiyənin Şimal-Şərqi Egey və Şərqi Aralıq dənizində elan etdiyi iki “milli dəniz parkı” ilə bağlı açıqlama yayıb.

Nazirliyin açıqlamasında sözügedən dəniz parklarının Türkiyənin ərazi sularından kənara və Yunanıstanın öz kontinental şelfi kimi xarakterizə etdiyi ərazilərə uzandığı iddia edilərək, bu tətbiqin beynəlxalq hüquqa zidd olduğu bildirilib.

Açıqlamada heç bir dövlətin milli yurisdiksiya sahəsindən kənarda birtərəfli qaydada dəniz mühafizə zonası elan etmək hüququnun olmadığı qeyd olunaraq, Türkiyənin bu istiqamətdə atdığı addımların Yunanıstanın beynəlxalq hüquqdan irəli gələn hüquqları baxımından hüquqi nəticə doğurmayacağı bildirilib.

Yunanıstan Xarici İşlər Nazirliyi Türkiyənin öz yurisdiksiya sahəsindən kənarda birtərəfli qaydada milli dəniz parkları elan etməsinin fait accompli yarada bilməyəcəyini bildirərək, bu cür addımların beynəlxalq hüquqa və mehriban qonşuluq münasibətlərinə zərər vurduğunu iddia edib.