Azərbaycan News Agency

Ukrayna Prezidenti Volodimir Zelenski Hindistanın xarici işlər naziri S. Jaishankar ilə Kiyevdə görüş keçirib.

Zelenski bildirib ki, görüşdə Rusiyanın Ukraynaya qarşı apardığı müharibənin başa çatdırılması, sülhün təmin edilməsi və Qara dənizdəki təhlükəsizlik vəziyyəti başda olmaqla mühüm məsələlər müzakirə olunub.

Zelenski Hindistanın müharibənin başa çatdırılmasına sadiqliyini yüksək qiymətləndirdiklərini bildirərək, Hindistanın sülhlə bağlı mövqeyinin aydın olduğunu deyib.

Zelenski bildirib ki, Jaishankar Kiyevdə olduğu vaxt Rusiya yenidən reaktiv mühərrikli “Shahed” pilotsuz uçuş aparatlarını buraxıb.

Bu PUA-ların İranın köməyi olmadan hazırlana bilməyəcəyini iddia edən Zelenski, Ukrayna döyüş təyyarələrinin hücumda istifadə olunan dronların əksəriyyətini zərərsizləşdirdiyini və bunun sayəsində Hindistan nümayəndə heyətinin təhlükəsiz qaldığını bildirib.

Zelenski digər böyük dünya güclərinin də müharibənin başa çatdırılması və etibarlı sülhün təmin olunmasının zəruriliyi ilə bağlı aydın mövqe nümayiş etdirəcəyinə ümid etdiyini bildirib.

Zelenski görüşdə Qara dənizdəki vəziyyətin də müzakirə olunduğunu, xüsusilə mülki dəniz daşımalarına qarşı mövcud təhdidlərə diqqət yetirildiyini deyib.

Zelenski insanların dəniz yollarından asılı olduğu bölgələrə ərzaq tədarükünün qarşısının alınmasının qəbuledilməz olduğunu bildirib. O, Rusiyanın Ukrayna limanlarını, ərzaq dəhlizini və təchizat xətlərini əngəlləməyə yönəlmiş hərəkətlərinin qlobal münasibətlərdə ciddi pozuntulara səbəb olduğunu iddia edib.

Zelenski Qara dənizdə təhlükəsizliyin təmin olunması üçün bütün tərəflərin birlikdə işləməli olduğunu bildirib.